得到建制派支持、差不多做硬立法會主席嘅經民聯梁君彥（圖），一直俾民主派議員批評冇親和力、冇笑容、做內會主席時好強硬。噚日佢上電台節目，被節目主持人係咁追問，話外面好多人都咁樣睇佢，梁君彥反駁時亦不改佢硬繃繃嘅態度，話自己做人處事一向嚴謹，特別係喺莊嚴嘅立法會，自己又唔係做talk show、娛樂節目，不過佢有聽到各方意見，亦希望議會多啲歡笑同寬容，開玩笑咁話或者會考慮去韓國整整個樣，去整多啲笑容。
至於青年新政游蕙禎未開會就喺facebook留言「吾與老賊誓不兩立」，反對冇經過選民投票洗禮嘅功能組別議員梁君彥出任立法會主席。梁回應話未來4年「70個議員都會綑綁一齊」，佢仍會邀請所有議員交流意見，但反問︰「大家係為香港市民做嘢，抑或用好負面嘅（態度）、唔去幫市民做嘢？呢啲我會尊重每一個議員嘅決定」。