近年好多不同調查話，香港人英語水平下降，連立法會議員英語水平亦大不如前，立法會前主席曾鈺成（圖）一直被公認為立會入面英文最好嘅議員之一，佢噚日出席牛津大學出版社一個英語活動，就話當年前特首曾蔭權諗過要立會隔星期用英文開會，只係冇議員理煲呔。
爆議員唔撐英文開會
曾鈺成話香港政府同市民其實都認同英文重要性，只係社會冇足夠環境畀年輕人多用英文，佢又話自己做咗十幾年議員，只係試過一次用英文開會，連前特首曾蔭權都建議過，規定立會隔星期用英文開會，不過冇議員支持，曾鈺成覺得因為立會議員發言對象係一般市民，市民平日用開廣東話，咁議員自然多用廣東話發言。
至於早排特首梁振英將英文嘅三司會議講成「Three C meeting」，有人批評係中英夾雜，曾鈺成話香港人習慣中英夾雜，佢自己係老式人，接受唔到中英夾雜方式，仲話原來民主黨主席劉慧卿都係非常厭惡中英夾雜，一聽到有人講開中文夾雜英文字，就即時皺晒眉頭。
究竟三司會議英文應唔應該譯做「Three C meeting」？又應該點譯？阿曾就話之前都有前立法會議員問過佢，但佢就話唔講嘞，不如交番畀政府啲權威人士去譯，留番講呢句話嘅人自己去譯！八方聽到呢度，似乎隱約覺得曾鈺成又輕輕寸咗梁特一嘢！