懲教署噚日舉行學員結業會操，26名懲教主任同110名二級懲教助理「出班」，由解放軍駐港部隊副司令廖正榮擔任檢閱官。佢喺致辭時話，法治係香港核心價值，懲教署就係法治嘅守護者，自己作為軍人，都為懲教人員感到驕傲，當然唔少得叫班學員一定要不忘初心同報效祖國喇！
應屆結業學員中包括晉升為懲教主任嘅42歲印度裔港人Bala H. Singh，加入咗懲教署23年，佢話自己係土生土長港人，不時為外籍在囚人士充當中間人，「好多時都係language barrier（語言障礙）搞到誤會產生，我就介入幫手。」另外，26歲嘅前新聞小花黃詠彤獲頒「院長盾」，現於羅湖懲教所做懲教主任。佢話，2013年曾採訪懲教署學員結業會操，覺得佢哋步操好專業，激發加入懲教。佢又話，做記者同懲教人員一樣有意義，不過新聞工作有時候係以第三身角色去睇社會，但懲教就係可以處身前線幫助在囚人士。