《成報》之前喺頭版刊登「爺爺尋孫」漫畫廣告，影射中聯辦主任張曉明要盡快向中央問責交代，噚日再將玩嘢行動升級，又再喺頭版刊登「厚酬 大粒癦求曝光」嘅漫畫街招（圖），明係影射負責港澳事務嘅人大委員長張德江。
呢個漫畫街招稱該名男子欲「極速在全宇宙揚名，證明實力存在」，漫畫入面個男人身穿西裝，戴眼鏡，最重要係額上有一粒癦，同張德江特徵一模一樣，廣告入面仲寫住「我大粒癦在北京財雄勢大，現為求極速在全宇宙揚名，證明實力存在，願付厚酬，求曝光機會」，仲喺「廣告」詳列服務收費，好似白事送花圈收一千億元人民幣，為食肆開張題字收9,999萬元人民幣等，話有興趣人士可聯絡駐港「向西」辦事處、想求特權就聯絡「龍蝦」、要吹牛聯絡「狼英」、求不死就聯絡「小明」，明顯影射梁振英同佢太太、以及張曉明等人。