國足周四主場不敵敍利亞0:1，世界盃亞洲區第三圈A組踢咗三場都係得一分，出線形勢惡劣，門將顧超犯咗門神保方都會犯嘅錯，引致失波都未算大鑊，賽後大批西安球迷離場時高呼「高洪波落台」，要勞動軍警驅散，所以高教練仲大鑊；不過高教練都仲話仍然有出線希望，叫球迷繼續支持。
傳國足球員更衣室痛哭
中國周四主場對敍利亞，因為下半場門將顧超出迎踢空氣，俾對手中場艾馬華斯射入空門，國足就咁輸0:1。嗱，唔好話我求大俠幫國足搵藉口，同晚意大利主場對西班牙（見另文），意軍門神保方都係咁樣犯錯，俾西班牙翼鋒馬捷恩佩雷斯射破大門啦，所以顧超都係犯咗所有門將都會犯嘅錯箒。賽後有報道話國足球員喺更衣室傷心到喊㖭，真係聞者傷心，聽者流淚。
好坦白講，輸波又點會係一個人責任，賽後國內傳媒同球迷都齊齊聲討中國足協同教練高洪波，好似中國足協為咗商業原因，第三圈五場主場都安排喺唔同城市比賽，俾球迷恥笑將五場主場變成作客。
球迷大喊高洪波落台
高洪波就俾傳媒批評仲未改善好進攻，起用後衞任航亦被炮轟，球迷就將矛頭指向高教練，賽後有近千位西安球迷仲留喺球場附近，高呼高洪波落台，嗱，「XXX落台」呢啲字樣喺國內好敏感㗎嘛，所以有大批防暴軍警奉召到場維持治安，好彩球迷最終都和平散去。
亞洲區第三圈小組第一、二名直接出線決賽周，第三名要踢附加賽，A組嚟講伊朗同南韓都算係突出嗰兩隊，周四南韓3:2險勝卡塔爾，伊朗1:0擊敗烏茲別克，兩隊三戰拎七分，形勢都好樂觀。國足三戰得一分，較為現實都係爭第三，下周二作客烏茲別克嘅大戰，都幾乎係國足出線與否嘅生死大戰，高教練就話：「頭三場輸咗兩場，形勢當然唔樂觀，不過往後仲有好多硬仗，中國都唔係完全冇機會，𠵱家最緊要係收拾心情，準備下輪比賽。」