自由黨噚日選出新一屆嘅黨領導，冇乜懸念地，現任主席鍾國斌出任黨魁一職，而主席一職就由飲食界張宇人頂上，至於副主席就有3個，包括胡漢清、邵家輝同埋李鎮強。唔知係咪新人事新作風呢，被問到新領導會否繼續「ABC（Anyone but CY）」嗰陣，鍾國斌竟然話，梁振英政府得番9個月左右，毋須有任何不良好關係喎！唔通田少唔喺度，自由黨即刻轉軚？
雖然鍾國斌仲提到，國家主席習近平話過，做特首嘅要做到「促和諧、謀發展、求穩定」，即係未來嘅特首都要做得到，況且家陣梁振英都未話會尋求連任，討論反梁立場係咪有變，似乎早得滯，最緊要都係睇候選人政綱。不過咁講始終令人疑惑，自由黨冇咗田北俊係立法會，好似真係轉軚喎﹗
田少繼續反梁連任
至於一直坐喺新領導層旁邊嘅田少就同八方講，佢自己係繼續反對梁振英連任嘅，不過佢嘅言論只係代表佢自己，亦都會尊重新領層嘅睇法，雖然𠵱家佢嘅睇法同新領導層有唔同，但相信明年特首選舉過後就冇分歧。
不過八方又留意到，田少一聽到鍾國斌講習主席嘅時候，係一直笑晒口咁，而且記招後田少同八方講，希望外界唔好以為自由黨跪低啦，事關佢相信新領導層只係覺得，既然梁振英都冇得連任而「無謂瘀佢」箒，唔知有田少解畫，嗰啲心入面好唔想CY連任，但又唔敢反到出面嘅大孖沙、商界人士有冇安心啲呢？
李八方
mailto:[email protected]