葛民輝的22歲兒子Jabez被封男神，眼神憂鬱殺死人，日前阿葛接受網上爸爸平台CHiLL PA訪問，首度開腔談家人，對於靚囝囝樣子不似自己，阿葛笑說：「應該好事嚟，但都係我生，各位想要男神咁嘅仔，我有貨。」還搞笑指當初生仔目的，是不想被老婆奪命追魂call：「整大佢個肚，將佢焦點擺小葛民輝度，搞到佢好忙。」
阿葛還自爆做低調老竇的原因：「當年好多人標參，張艾嘉個仔同我個仔同年，佢俾人挾過，好多唔係香港人做嘛，係搵人落嚟做，你偷我架車都事小，挾咗我個仔，畀咗錢你都唔知攞唔攞得番。」他又自言價值觀很傳統，要求囝囝食飯叫人，不可以做令媽咪傷心的事。
撰文：皓騫