近年石詠莉（Sukie）發奮為自己洗底，堅決賣唱功，後日（9日）佢喺九展舉行人生首個個唱「Sukie S My First Stage Live 2016」，雖然佢希望Freeze可以再次合體，可惜好夢成空。
陳樂榣拒演出
前日Sukie喺新蒲崗綵排時話：「好可惜，Alley（陳樂榣）有自己家庭，其實我哋要尊重佢意見，我哋希望佢可以幸福快樂。𠵱家佢有小朋友，要花時間綵排係好難，佢又有自己生意，我哋做好啲，做埋佢嗰份，會拍番畀佢睇。」甄詠珊就安慰Sukie話：「我冇諗合唔合體，佢哋出聲我一口答應，係大家一個回憶，不過有埋Alley更加完美。」
雖然三缺一，前幾日Sukie同甄詠珊為《Shiba-Za》排舞，甄詠珊話：「我哋係要排新舞，大家又跳番舊，我哋仲記得以前嘅舞步，真係入咗血。」Sukie話：「嗰啲歌係我哋成日表演嘅歌，回憶番晒嚟。」
Sukie話三姊妹係唔使開口講，甄詠珊認同：「嗰段時間相處太多，成日飛，有好多美好回憶，三個女人炒鬧一定有，同好朋友鬧完交都會好番，不過我哋一個眼神就知道，記得Sukie係最唱得，你知有啲技術上，有一支咪收唔到音，一個眼神我哋就轉咗支咪畀佢。」
撰文：馮仁昭