必瘦站（1830）同「股王」騰訊（700）有乜關係?原本冇乜，家陣就有嘞。
必瘦站公佈，噚日喺孖屐掃入23.5萬股騰訊，每股平均價217.2元，涉及資金5,100萬元。留意番，必瘦站舊年盈利1.3億元，今次買騰訊嘅金額等於舊年盈利四成，騰訊最近見過高位220元，必瘦站咁捨得掃入騰訊，應該估佢可以再創新高喇。
其實近年生意難做，唔少公司都透過買賣股票幫補下，好似周生生（116）喺舊年港股大時代時，就公佈沽咗90萬股港交所（388）股份，賺咗2.5億元，彌補營業額下跌，公司仲揸緊超過406萬股港交所㗎。
但周生生低位買入港交所，又唔同必瘦站嘅玩法喎，而且，投資者又會唔會話佢不務正業呢。