海洋公園又有可愛新成員！一隻嚟自日本大阪天王寺動物園、喺圈養環境下出生嘅年輕雄性樹熊Sora，今年7月1日抵港，通過隔離檢疫後，前日已經進駐澳洲歷奇展館，同園內兩隻喺2014年10月由阿得萊德抵港嘅樹熊為伴，齊齊以動物保育大使身份，接待來自世界各地嘅遊人。
海洋公園動物及教育部執行總監蔣素珊話，多謝天王寺動物園嘅信賴，將Sora交畀公園照顧。原來Sora父母來自澳洲維多利亞州，據知佢充滿好奇心，好鍾意探索新環境，並且非常享受護理員幫佢梳毛嘅時刻，成日梳梳吓都瞓着埋。
由於Sora同公園嘅雌性樹熊悠悠都接近4歲，開始踏入性成熟期，園方會喺下個繁殖季節、即係明年4月，密切觀察佢哋有冇發情行為。