中環威靈頓街一個空置舖位外掛住寫有「Wong Po Jill Joe」、即係同粵語旺舖招租同音嘅特別招牌（圖），Kongish Daily《港語日報》facebook專頁po咗招牌相後，呢個創新嘅「Kongish（港式英語）」招租手法，惹嚟網民熱話。
原來招牌係地產公司協成行嘅傑作，協成行話舖位於中環威靈頓街22號，創意招牌屬董事總經理方文雄親自構思，話方文雄有感一般商舖招租廣告好刻板好悶，希望搞搞新意思，取代慣有嘅寫法，店內仲仿時裝店設有陳列架同展示空間，模擬商舖作時裝店供客戶參考。
方文雄係邊個？佢爺爺係慈善家方樹泉，老竇係方潤華；平時斯斯文文唔算多嘢講嘅方文雄，估唔到咁鬼馬。據知面積587平方呎嘅舖位已經租出。