有朋友家族生意正申請在港上市，由於同時要「做生意」，又要應付上市相關工作，忍不住向密西比「呻咗幾句」。朋友說：「我屋企檔生意好簡單，原本冇乜嘢要搞嘅，都只係同啲上市委員會文書往來，但之前突然爆咗幾單一上市就爆升嘅新股，搞串咗個場，啲嘢要重新執過，煩爆。」
跟上市委員打交道，不是交給保薦人處理就好了嗎？朋友表示，文書往來當然是交給專業人士處理，但由於上市要求暗地裏提高了，從而令上市架構基本上要「執過晒」，整個上市團隊又要進行大量冗長會議，工作量與工時當然直線上升。
友人說：「保薦人同我講，雖則證監同港交所（388）仲未正式提高上市門檻，但𠵱家唔可以淨係睇啲上市要求㗎啦，好似盈利要求，就自動自覺增加約30%，禁售期就盡可能自己要求加監，為求唔好俾證監覺得你想借上市啤殼……若果唔想煩，就最好有咁多資產擺咁多資產入去，家陣咪煩緊呢度囉。」
監管當局要求多多，會否影響上市計劃？朋友語帶無奈地說：「煩都要上㗎，我間嘢要資金擴張，若果唔係咁，咁煩一定唔上，點解要同街外人分先？」話雖如此，據聞現時主板「殼價」約5億元，未來收緊上市要求，相信價格更只會「有升冇跌」，辛苦是值得的。
密西比