財政司司長曾俊華同立法會前主席曾鈺成兩位疑似特首候選人，一直對參選嘅態度相當曖昧，當然啦，北京係咪真係開綠燈，固然係佢哋表唔表態嘅理由之一，但為免俾方丈搞，可能都係原因之一。
5年前嘅今日，時事評論員李鵬飛向《蘋果》證實，聽聞過梁振英喺一啲私人聚會上，形容自己手上有兩粒「政治手榴彈」，足以摧毀唐唐嘅參選之路，飛哥當時仲話呀，「手榴彈喎，殺傷力點可能唔大？」
其實呢，當時唐唐嘅感情缺失已經曝光，但唐宮僭建就去到2012年2月、即係選舉倒數前一個月左右先至突然爆出嚟，仲要係有晒圖則，點吟都吟唔甩，呢兩件事最終炸斷唐唐特首之路。到底呢兩個手榴彈係邊個掟出嚟？八方肯定冇人會認，但重溫飛哥當年一席話，都咪話唔得人驚。