方嘉柏馬房上周三跑至尾場至起孖，但這晚快活谷跑完前兩場，佢已經全勝包辦第一口孖寶，當中頭場與雷神合作贏完大熱門「糖黐豆」，到第二場四班1200米馬上以6歲之「綠色贏」靠徒弟何澤堯再下一城，後駒之前18戰不勝，今仗由徐雨石轉投方廐初出即贏，單Win及組合獨贏A2分別派75.5及21元。
「綠色」系馬主李榮翰對上一次勝出個人名下馬，已經數到2012年尾憑「綠色威」勝出三班田草1400米。相隔接近四年，佢以「綠色贏」打破悶局，此駒沿途守第四位下，最終即彈離贏個多馬位，在港第19次出賽終於開齋，方嘉柏撚來投馬確有一手，事關今季佢已經有「事必獲利」及「舖舖旺」先後於谷草打開轉廐勝門，「綠色贏」可謂幫馬房擦亮招牌，錦上添花。
「綠色贏」馬主李榮翰表示，此駒轉入方廐後比前更健康，更有耐力，愛駒不是短途材料，日後可向更長途程進發。方嘉柏則表示「綠色贏」轉倉時有不少健康問題，刻意讓馬兒注滿新鮮感跑今仗，他很高興為牠開齋，並指馬兒爭長途威力或更大。
呢場雷神騎大熱門「勁飛聖」靠放第二，第三名由次熱門「妙感」拎到，第四名係冷門「喜盈盈」，四重彩派5,951元。