假如星期四整體大市繼續升，恒指可能進行旗形突破，睇吓能唔能夠進入一股慢升走勢，係就襟玩啲，益咗二、三線股，睇中海油田服務（2883）破頂後急升就知，復蘇概念可以強到不得了，下一隻睇煤炭股當中率先破頂嘅兗煤（1171）。
之前有內地傳媒報道，包括中煤在內嘅四大煤企將10月份的5,500大卡下水煤長協價格上調至每噸548人仔，漲幅係歷史新高，至於環渤海動力煤指數升到每噸561人仔，亦係兩年半新高，睇形勢出年會比2014年好，係真復蘇。
喺大陸致力淘汰落後產能嘅同時，煤炭股神華（1088）率先獲批增產，第一係反映中央發覺再唔畀龍頭增產，煤炭價格可能會襟都襟唔到住咁升，早先張揚煤炭價格嚟緊不得了；另外亦反映中煤、兗煤好大機會繼神華之後加入增產行列，但另一邊廂煤炭落後產能作為國家重大任務卻繼續進行，相信煤炭行業好景將能夠持續，股價大有機會強勢，既然兗煤股價最強，當然追埋佢。
晉佳
http://fb.com/advanceguy1