新盤賣唔賣得，示範單位執成點都好緊要。個別發展商會用幾萬蚊，買頂級香水擺在廁所做display，務求做到豪宅氣派撲面而來；亦有發展商會特登搵同事隔幾個鐘就清潔示範單位，聽講其中一個要求，係洗手盆唔要見到有任何手指模或水迹，要畀參觀者見到個單位最完美一面喎。
正常嚟講，示範單位入邊嘅擺設通常會撕走晒價錢牌，陳列用嘅衫褲亦會剪走品牌標籤。不過，長實地產（1113）同郭炳湘合作發展嘅亞皆老街新盤，近排重推，最平嗰間賣超過3,000萬元，但現樓連裝修單位，就執得唔夠徹底，部份擺設仲貼住價錢牌㗎。
好似梳化上幾個咕𠱸，講明畀大家知，係英國牌子Designers Guild，每個950元到1,900元，都算配合到層樓嘅身價，但餐桌上嘅貝類擺設就唔係好襯嘞，每個20蚊咁大把。不過又咁講，潮流興mix and match吖嘛。