一跑番快活谷，練馬師方嘉柏又顯谷草王本色，這晚一開場第一場五班1800米，方仔即贏大熱門「糖黐豆」，呢匹六歲馬在雷神胯下後上輕勝，單Win及組合獨贏A1分別派28及15.5元，雷神亦告保持停賽復出後未斷纜，兼擴大騎師榜領先優勢。
「糖黐豆」上月21日配何澤堯跑同班同程爆冷不成，輸俾今場排位前因馬主丁父憂退出的「大寶庫」做阿二，呢次後駒不在陣，「糖黐豆」換上雷神零舍唔同，沿途守四、五位，直路一望空即拋離對手逾兩馬位直奔終點，輕鬆補中打開今季勝門，本身累積三捷皆由雷神經手，人馬堪稱最佳組合。而向來多在沙田大賽日或特別日子才現身的雷神太太Taciana這晚好俾面，在此場普通五班賽亦露面拉頭馬，兩夫婦更熱吻起來，公然大晒恩愛。
方嘉柏指「糖黐豆」今仗莫雷拉發揮一流，一轉彎即踩油彈離馬群，在五班贏兩個多馬位比較少見，此馬似乎很馴服雷神的韁繩。小方又透露「糖黐豆」會集中主攻谷草，希望在五班再有好表現。
今場五班賽開熱頭冷腳，二至四名「馬來之珍」、「白玉凱旋」及「尚華盛甲」都係十倍以外冷馬，四重彩派三萬八千幾。