甘草演員王萊於上月28號逝世，享年89歲。甘國亮噚日喺微博證實離世消息，上載兩張王萊生前相片，留言：「前輩王萊姐10月7號紅磡世界殯儀館出殯。」曾四奪台灣金馬獎女配角嘅王萊，原名王德蘭，北京出世，25歲到香港發展，50、60年代開始投身演藝事業，既當主角亦演配角，邵氏時期演過唔同類角色都好突出，有「千面女星」稱譽。
「係語言專家」
王萊除57年同林黛演出《金蓮花》、59年同尤敏演出《玉女私情》、82年同李翰祥導演合作《武松》等作品之外；亦憑電影《人之初》、《小葫蘆》、《海峽兩岸》同《推手》奪金馬女配角，成為奪得最多金馬女配角嘅演員。92年王萊因為健康問題息影，之後移民加拿大。
甘國亮噚日接受電話訪問，講到王萊離世消息：「係另一個前輩葛蘭話畀我知。我哋都有好多年冇見面，因為佢不良於行，坐輪椅好多年，有時唔會驚動佢出嚟飲茶。」佢話係由葛蘭介紹認識王萊，細細個已經睇呢位前輩做戲：「有啲演員好後生，但唔知點解一出嚟要做人阿媽，佢就係呢種，但佢比較搶鏡，因為佢係好好嘅性格演員。佢仲教過我上海話，大家都好尊重佢嘅配音技巧，佢講嘅說話好純正，好有力，係語言專家。」
撰文：馮仁昭