這晚谷草第六場四班一哩，賽事期間有大雨，不過對柏寶策騎、賀賢馬房熱門之一「勝利仔」全無影響，排4檔卻全程走大外疊，蝕位無數卻直路照輕鬆衝贏兩馬位，單Win及組合獨贏A2分別派52及21.5元。除了反映「勝利仔」淋地特佳，亦證明此駒在四班超晒班。
「勝利仔」跨季近四場全跑谷草A欄一哩，在柏寶胯下豪奪三冠一亞全入Q，人馬夾到冇朋友，暑期轉5歲後正大熟大勇，柏寶連同第五場為方嘉柏贏「皇者拍檔」在內，一手包辦第五口孖寶，個人連續兩個賽日起孖。
這晚前五場賽事有四場由大熱門贏出，今場「由心出發」卻大熱倒灶前四名不入，第二、三熱門「勝利仔」及「實在威」乘虛而入，分別跑一、二名，令13倍大熱Ｑ順利開出，三、四名則由半冷門「金碧光芒」及落飛馬「靚先生」分別拎到，四重彩派一萬一千幾。三T正獎落空，買中頭兩關可收約二萬蚊安慰獎。
賀賢指「勝利仔」跑淋地特別醒神，臨場及時雨場地起變化對牠有利，加上全晚利後上馬，對這匹後勁凌厲之輩亦有利。