早幾日有網民貼咗幾張特首梁振英喺ifc Apple Store排隊買iPhone 7嘅相，唔少網民質疑梁特為選舉做show，顯示冇用特權！噚日689喺fb解畫，話網上幾張相引起好多人興趣，問佢係咪「換7」？佢話因為屋企人跌壞咗iPhone 6，佢落開中環順便去買部iPhone 7，臨尾仲回應好多網民關心佢排隊：「當日顧客不少，人人都排隊，應該的。」
有網民質疑乜𠵱家去Apple Store買iPhone 7，唔係要先登記iReverse再去拎機？亦有網民話因為iPhone 7現貨多，話唔定可以即場做iReverse！更多人質疑梁特講到人人都排隊，排隊係「應該的」，言下之意係咪如果冇乜人排隊，佢就唔會排？
聯校辯論賽俾學生寸
梁特唔只喺網上被質，喺主場一樣被砌。佢日前到齊心基金會同百仁基金合辦嘅聯校辯論賽後，喺fb貼咗好多受學生歡迎嘅相，但原來當日發問環節有學生揶揄佢民望低，問佢若特首需要喺民望低情況下連任，點樣提升民望？又有學生話今次立會選舉支持非建制總票數比建制高，問梁特點樣檢視佢話建立「香港營」嘅成效？真係句句有骨！
識睇睇留言
Wins Wong：其實你去排隊買iPhone係唔需要向市民交代，煞有介事指出沒用「特權」打尖只顯示到係做緊戲。
葉少秋：Note7襯佢多啲！
Danny Tang：明知無得留低都要扮排隊守規矩，博同情分；特首就冇份，茄喱啡就有佢份。
Vivi Cheng：一次唔偷雞就做保長？應該嘅嘢使乜特別同人講？
Sunny Tse：搞公關搞到咁低莊，你班師爺都食得屎！
資料來源：《蘋果》網頁
李八方
mailto:[email protected]