新世界發展（017）創辦人鄭裕彤上星期仙遊，佢女婿杜惠愷呢兩個星期似乎幾多動作，好似上星期分批減持新世界股票，最近又向新世界買入一層商廈。
新世界噚日公佈，以2.85億元，向杜惠愷做大股東嘅豐盛機電（331）出售九龍灣其士商業中心17樓全層，建築面積3萬呎，豐盛會用作辦公室。
查實豐盛機電今年5月已經將寫字樓由鰂魚涌，搬咗去其士8樓，而豐盛機電母公司豐盛創建就喺16樓，𠵱家買埋17樓，公司都話交易可以為擴張做準備，又可以降低租賃成本喎。
講開豐盛機電，其實除咗親戚上頭，公司舊年底上市時，亦搵來新世界主席鄭家純做非執行主席，關係微妙。