周二舉行嘅NBA季前熱身賽，杜蘭特（Kevin Durant）終於都喺甲骨文球場登場，兼帶領勇士喺主場以120:75大炒快艇！雖然喺季前熱身賽嘅成績未必可以作準，但勇士呢場大勝無疑係向球迷顯示重奪總冠軍嘅決心。
今夏轉投勇士嘅KD喺今場表現搶鏡，呢位28歲嘅前鋒正選上陣24分鐘射入21分，而佢亦不斷同「咖喱仔」史堤芬居里（Stephen Curry）執行拆擋（Pick and Roll）戰術，增加唔少出手機會。報稱六呎九吋、但實際身高可能係七呎嘅KD同咖喱仔拆擋後，可能對方會換咗一個比較細粒嘅後衞守佢，令佢嘅入波機會大增。另一位勇士新兵麥伊（JaVale McGee）雖然喺比賽冇乜好表現，但就憑騎呢新髮型搶鏡。
布拉特收騎士指環
至於喺上季贏得總冠軍嘅騎士，早排就決定訂造過千隻冠軍指環送畀球隊職員，但估唔到季中俾球隊炒咗嘅前教練布拉特（David Blatt）都有份，佢仲話：「騎士佢哋畀隻指環我，係因為覺得我對球隊贏總冠軍都有貢獻。」