新地（016）邊位董事最高薪？唔使問阿貴，當然係最幫到手賣樓嘅「樓神」雷霆喇，根據新地最新年報，雷霆舊年年薪2,203萬元，加薪4%，呢個加薪幅度同唔少打工仔差唔多，咁佢嘅4%當然豐厚好多喇。
雷霆年薪入面，其中有1,133萬元係花紅，相當禾味，不過相比另一位樓神，長實地產（1113）樓神趙國雄就高人工啲，舊年年薪2,644萬元，雖然話相差400萬元，不過對於兩位，應該只係細數目。
至於新地大股東郭氏第三代，2014年底正式出任執行董事嘅郭基煇（Adam），舊年全年人工就有629萬元，除開一年，月薪52萬元，相對個別富二、三代有過千萬年薪，呢個數都算合理喇。