5年前喺有線過檔大台嘅李佳芯(Ali)，雖然係有線幫，但由於唔係余詠珊愛將，機會並非手到拿來，最初只係被安排喺《名門暗戰》做二奶角色，不過憑住演技，李佳芯爬吓爬吓終於上到一線位，喺新劇《律政強人》榮升女一。
努力有回報，昨日有報道指李佳芯喺監製林志華新劇中，揮低大台御用女角蔡思貝，再次擔正，飾演法官嘅佢，近日已經刨定劇本記對白。據報道所指，新劇女一原定搵《EU超時任務》王浩信搭朱千雪冇得輸班底，但由於千雪BB要返學讀書，結果機會就落喺李佳芯同蔡思貝手中，最後林監製拍板起用李佳芯。
一個up and coming，一個機會俾到足，但演技仍屬初階班，呢個賽果，好合理。