保險界龍頭近排鬧大交，話說前排保誠賣廣告，話自己百萬圓桌會（MDRT）會員、即每年佣金收入超過55.2萬元代理人數全港第一，友邦香港噚晚即發嚴正聲明還擊，話自己先係全港第一，仲致函去美國MRDT總會投訴表示不滿喎。
究竟邊個啱邊個錯呢？其實保誠早前宣稱自己有2,612名理財顧問晉身MDRT，不過友邦就話自己有2,648名MDRT，仲引用埋美國MDRT總會數據，總會亦回覆話數據正確，證明友邦係香港第一。
兩間保險公司嘅MDRT數據都係截至今年8月，就咁睇道理好似喺友邦嗰邊。而對於有「其他保險公司」聲稱自己第一，友邦唔單止不滿，仲向美國MDRT總會投訴，華華問保誠就呢件事有冇回應，佢哋就無回覆。
其實點解保險公司咁着重MDRT數據？因為MDRT多代表間公司產品得，旗下保險代理亦sell得，會吸引同行跳槽，對成間公司都有好處，而其實兩間公司MDRT數據只係爭36人，可能過埋今個月個數據又唔同咗，不如大家放多啲時間做生意好過。