上市架構諮詢爭議，喺立法會選舉完結之後，沉寂咗一輪，今日下晝喺會展又開壇砌過！其實係成功連任金融服務界議員嘅張華峰做大旗手。
雖然請唔到三位頂爺，但港交所（388）上市部、證監會企業融資部，同財庫局分別派出一位女將出席研討會，但只係觀察，唔會發言。
張華峰同經民聯都算有面子㗎喇，事關上市公司商會月初都搞咗個論壇，一樣有廣發英雄帖，但三個監管機構都冇人到。唔通真係怕得罪今期流行嘅經民聯？張華峰同獲得大部份建制派支持角逐立法會主席嘅梁君彥，話晒都份屬黨友吖，今次研討會經民聯亦都有「冠名贊助」。
其實經過成個暑假嘅討論，幾乎所有正反論點都擺晒喺枱面，好難有新point，有花生友笑話，可能又淪為圍爐取暖，但搞手話起碼佢哋歡迎唔同意見。唔知寸緊邊個呢？