【爆相爆片】生日前夕遺失護照
陳冠希警署報案

陳冠希（Edison）早排為內地超模女友秦舒培疑被林志玲阻撓工作，搞到喺微博爆粗鬧林志玲。靜咗一排嘅佢，前日就現身灣仔警署，原來係唔見咗護照要報警。
讀者談先生透過本報「爆相爆片」報料，話前日下晝1點幾見到Edison同疑似男助手去咗灣仔警署報案室，佢個樣仲愁愁地，逗留咗一個鐘左右後先離開，然後靠住欄杆邊撳電話邊煲煙，煲完煙先上車離開。馮仁昭前日打畀Edison，佢以WhatsApp回覆話：「我唔見咗個Passport呀！哈哈，冇大新聞呀！」

新衫象徵重生

另外，Edison主理嘅潮牌CLOT，會喺聽日亦即Edison 36歲生日前夕推出新系列「EDC R.I.P. COLLECTION」，真係大吉利是、百無禁忌。呢個系列搵嚟洛杉磯品牌Pleasures一齊合作，出嘅tee正面有張倒轉嘅Edsion黑白相，背面寫住「R.I.P EDISON CHEN Father, friends & Lover 1980-2008」，而寫2008年，據講係Edison想話自己喺08年淫照風波之後已經死去，𠵱家重生咁解。