上星期五晚國慶前夕，恒生銀行（011）喺博愛堂舉行咗個酒會，不過個party係慶祝佢哋私人銀行成立20周年，當晚逾300名賓客出席盛會，恒生私人銀行及信託服務主管陸庭龍（Alan），仲同表演嘉賓、實力派歌手「Miss Chan Chan」陳潔靈，合唱哥哥張國榮同依人嘅金曲「誰令你心痴」助慶㖭！
恒生「一姐」李慧敏、執行董事馮孝忠、零售銀行及財富管理業務主管關穎嫺，跟Alan齊齊主持祝酒儀式，不過望落張相，最有party feel嘅係打咗煲呔嘅陸庭龍！
佢告知華華，原來大半年前已開始轉打煲呔，當晚打扮只係平日上班look。何解打煲呔？Alan話理由好簡單，「因為食嘢太容易整污糟條呔」，煲呔就方便好多，雖然曾經掙扎過，驚有抄襲之嫌，但打打吓不知不覺愛上煲呔，同事們更幫佢起咗個「煲呔Luk」別號！