雷神莫雷拉有幾受歡迎，相信大家都知道，而呢日他更是大有收穫，獲得練馬師姚本輝提供兩匹極具實力的新座騎。
原來雷神今朝初次接手姚廐一對綠魔「有得威」及「志友運」。「有得威」試第二組1000米草閘，有前有後步伐強勁下輕勝，強如「巴基之星」亦只跑第三。「有得威」喺上季經典一哩賽及香港經典盃兩項一級賽都獲季軍，潛力有幾強毋須多說，上仗季內初出特首盃1200米亦上名，反映狀態來得好，只係隻馬已有近一年未贏過，姚本輝難免有壓力，所以交予雷神接手，無非希望求突破，如果唔跑本月23日的級際賽的話，亦可以選本月26日快活谷一班一哩。
至於「志友運」，今朝由雷神試第四組1000米草閘，末段輕鬆追上奪勝，成熟狀態保持良好進度。「志友運」上季新馬賽一出即入Ｑ，當然有質素，3歲馬上仗插四班首戰，用吳嘉晉唔上唔落得第五，稍後報名出賽易配雷神，你話騎功高過吳嘉晉幾多班？梗要吼實其動向。