老佛爺Karl Lagerfeld每季都為Chanel搞搞新意思，大改造大皇宮騷場，昨日舉行的2017春夏騷場就變為「Data Center Chanel」數據中心，runway周圍都是伺服器。設計少不了簽名作tweed jacket，但加入數碼化小物，clutch飾LED閃燈，十分cyber，延續上兩季閃燈涼鞋設計，至於由戴面具的女模打頭陣，帶來驚喜。
G-Dragon緋聞日模女友小松菜奈、內地女星白百何、馬思純、韓劇《茶煲阿四》女星韓藝瑟、型男尊尼狄普（Johnny Depp）的16歲女兒Lily Rose Depp、法國男星卡斯柏烏 尼奧（Gaspard Ulliel）、曾扮演Coco Chanel的 法國女星Anna Mouglalis、美國著名歌手Usher等睇騷，香港代表則有即將23歲的文青女神Angela (袁澧林) 、諸葛紫岐、化妝師Zing。
Angela首次來巴黎，她表示睇到很多古舊的街、巴黎鐵塔，之前都是在相中看到，現在終於可以親身看到：「最想去羅浮宮，可以睇超正嘅歷史民物。」還想跟男友一齊來，因為地方很浪漫：「第一晚食飯見到一對男女kiss咗好耐，呢度係好平常嘅事，好浪漫。」之前到跳蚤市場影相，見到二手衫及傢俬，自己買了個小手袋。講到她快畢業，她說：「要兼顧拍劇係辛苦少少，final year要勤力少少。」
諸葛紫岐表示此行看Chanel及明日的LV騷就往倫敦，問花費多少才升呢為VIP睇騷？她說：「都冇幾多錢，好開心佢請我睇騷，老公喺美國做緊嘢，好掛住個仔，會買禮物俾老公同個仔，個仔成日問有乜surprise。」講到莊端兒單方面提出解約是非，諸葛說：「嚟睇騷，唔講呢啲。」
小松菜奈首次來看騷，她表示興奮：「最想去vintage store買二手衫。」會否預G-Dragon一份？她未有回應，身旁經理人亦擋駕。
更多時尚、美容新聞，即上： http://add.appledaily.com