小時了了，大未必佳，阿根廷前鋒美斯17歲就成名，世界其他球會都爭相發掘新神童。周一蘇超嘅U20賽事由些路迪對赫斯，原本都冇咩特別，不過些路迪就派出年僅13歲嘅卡拉莫高丹比利上陣，破晒青年軍最年輕紀錄；就睇吓呢位科特迪瓦神童，會好似美斯咁飛黃騰達，定好似美國神童艾杜咁一閃即逝啦。
蘇超周一上演U20青年軍比賽，些路迪主場3:1輕取赫斯，戰果冇咩特別，不過13歲嘅卡拉莫高丹比利喺81分鐘後備入替，就成為英國傳媒，以至世界傳媒嘅焦點。雖然喺呢九分鐘比賽，丹比利就唔算有咩建樹，但已經成為蘇格蘭呢個級別最年輕上陣球員，甚至有傳媒將佢譽為「新美斯」。
對手個個高一個頭
些路迪青年軍教練麥恩尼就否認揠苗助長，佢話因為好多球員入選蘇格蘭U19，冇人之下先逼於無奈咁起用到丹比利。不過，些路迪官網就以「細碼指揮官做好本份」嚟形容丹比利，似乎都幾睇好佢。13歲仔嘅丹比利老竇係科特迪瓦人，所以長大後代表邊個國家都有得揀，睇佢之前同同級對手交鋒嘅片段，擅長左腳嘅佢都幾扭得吓，亦都有傳射腳頭，難怪咁快已經被捧到上天。
講真，之前被捧為神童嘅新星，又有幾多好似美斯咁成為一代巨星？好似美斯17歲已經幫巴塞隆拿踢西甲，之後做埋球王，而之前英格蘭都有神童，就係前鋒奧雲，又係未夠18歲就幫利物浦踢英超，仲破埋英格蘭最年輕世盃入波紀錄，踢過皇家馬德里同曼聯等大會，𠵱家名成利就，就做收租佬、大馬主嘆世界。
近代神童冇邊個掂
不過美斯同奧雲之後，叫得神童都冇咩好結果，好似美國神童艾杜，14歲上陣破美職聯最年輕上陣紀錄，但外流賓菲加同摩納哥等都踢唔掂，27歲已經轉咗12間球會，𠵱家效力嘅譚柏灣暴徒只係北美聯賽球隊。至於皇馬嘅挪威神童馬田奧迪加特，加盟咁耐都只係大後備。另外，日本神童久保建英10歲就加盟巴塞青年軍，但間接就搞到巴塞違規引入外國小將，被國際足協處分停止三個轉會市場操作；15歲嘅久保建英回流FC東京，就睇吓佢成年後，巴塞簽唔簽番佢啦。