放棄英國護照參選立法會主席嘅經民聯梁君彥，如無意外會喺下周三登上主席寶座，但佢俾議員批評出任內會主席時作風保守、強硬，評價唔算太好，佢噚日喺曾鈺成分享會答問環節，趁機為自己「平反」，話曾鈺成做主席時趕人無數，自己就一個議員都未趕過、一塊布都未剪過喎（做製衣時唔計），又請教曾鈺成點同泛民議員有良好溝通，「做咗惡事，人哋都唔話你惡」。曾鈺成就話撐梁君彥，話佢做代主席時好稱職，未試過梁君彥處理嘅事佢要推翻再做喎。
梁君彥似乎坐定粒六做主席之時，財委會主席亦料由保險界陳健波接棒，盛傳建制派連副主席都要霸埋，搞到有意競逐嘅專業議政會計界梁繼昌噚日趁機拉住陳健波密斟，梁繼昌話有就建制派對讓路泛民「翻來覆去」情況表達不滿。