一對着住婚紗禮服嘅新人，瞓喺灣仔一幢大廈天台嘅草皮上，張開雙手好閒適咁影婚紗相，一位喺美國長大嘅電影導演，無意間用航拍機影到呢個溫馨嘅一幕，仲將相片上載facebook，希望喺茫茫人海中搵到呢對主角。
喺美國長大嘅導演Brandon Li上月28日喺香港用航拍機拍攝日落美景，當電池就快用完，佢打算回收航拍機並將鏡頭向下時，意外捕捉到呢個絕美時刻，亦同附近擠迫大廈相映成趣。李導演話「我當時沒有發現如此有趣的一幕，直至我重看拍攝片段，才看到這綠油油的屋頂」。佢話張相做咗少少手腳，將原有兩名企喺新人旁邊、相信係攝影師嘅人用軟件執走，又調校過顏色，令呢對新人更突出。相中新人身處嘅應該係灣仔嘉薈軒，李導演希望可以透過網絡搵到相中人。