NBA陸續舉行季前賽，唔少新兵都先後登場，好似公牛周一主場對公鹿，就有「愛回家」嘅獲迪（Dwyane Wade）同助攻王朗度（Rajon Rondo）「地標」上陣，不過兩人加埋只係幫新東家拎得八分，公牛亦以91:93不敵公鹿。
今夏NBA有唔少大牌轉會，其中「閃電俠」獲迪拒絕熱火低薪續約要求，返回出生地芝加哥，唔少球迷都讚好，連同朗度加盟，仲有幫美國拎到奧運金牌嘅占美畢拿（Jimmy Butler），呢個公牛後場三巨頭都有啲睇頭。不過，佢哋周一出戰公鹿，獲迪同朗度喺地標戰好似有保留，獲迪只打12分鐘三投兩中得六分，朗度仲得兩分。另邊廂，公鹿教練傑特（Jason Kidd）就玩吓怪招，一度排出長人陣，最矮已經係六呎九吋嘅J柏加（Jabari Parker），六呎11吋嘅「字母哥」G安迪度安寶（Giannis Antetokounmpo）仲擔任控衞，睇吓常規賽用呢個陣又work唔work？
奧拉迪普唔夠皇馬砌
同樣係新兵，雷霆後衞奧拉迪普（Victor Oladipo）就搶韁得多，喺作客西班牙皇家馬德里嘅季前賽攻入34分，連榮升「大少」嘅韋斯卜克（Russell Westbrook）都係得18分咋。不過，雷霆有呢對新孖寶，一樣加時輸畀皇馬137:142。