黃金周假期，文青陸客唔去買呃秤花膠，唔去金紫荊到此一遊selfie，更加唔去紅磡送羊入虎口幫襯福建幫買假金。這個黃金周，年輕自由行客，三三兩兩，執自己的一帶一路生，改去禮賓府，睇吓有無機會見到狼特，在後花園種菜餵狗的風景，可能只此一家，捕捉到po上網，一定抓到like。明年哦，狼特雖然夠狼，還能霸住上亞厘畢道，連續十年「佔領中環」嗎？
另一批陸客，捨鬧市摸去元朗，啃住老婆餅行上丫髻風水山，飽覽大包圍的泥頭山，和近期紅到發黑無處不在的棕土貨櫃場。聽說場主出租櫃場月賺八百萬，香港真箇遍地開遮……噢噢不，是遍地開倉，創新科技得啖笑，露天倉爛笪笪可以賺得咁盡，真正的黃金周，世世代代就在新界！新界祠堂，聽聞價錢啱，都可以賣。陸客動腦諗吓，這種中介，有得做。倫敦市開始收緊外資買樓，擺明釘中國土豪牌。新界有鄉事睇場，無人敢郁，投資買賣，有狼特撐腰，西環背書，有買貴冇買錯！官商鄉黑黨，五角關係新常態，無得輸！