唔經唔覺，《成報》已經成為唔少市民生活中不可或缺嘅一部份，好似八方咁吖，朝朝早一起身，都總係好想第一時間睇睇《成報》當日嘅頭版到底搞乜鬼？就住「亂港四人幫」仲有冇乜嘢新料爆呢？而鍾意食花生嘅人，又何止八方一個？公民黨陳淑莊Tanya已經變咗《成報》粉絲，唔睇過成日都會囉囉攣喎！
查實Tanya情迷《成報》都唔出奇吖，皆因《成報》唔少頭版，真係幾有創意，尤其係9月30日頭版「爺爺尋孫」嘅所謂廣告，話要搵一個叫張小明嘅人，擺明諷刺中聯辦主任張曉明啦，Tanya都話對《成報》呢日頭版記憶猶新，大讚「咁都畀佢諗到」。
Tanya笑笑口咁話，《成報》嘅頭條已經成為自己每朝早起身第一樣最想睇嘅嘢，因為真係不時帶嚟驚喜，睇完全日都好醒神，尤其係「佢（《成報》）日日鬧689、張曉明、張德江，又唔見689向《成報》出律師信？」Tanya覺得好古怪，有山雨欲來之勢，肯定同特首選戰有關。
推埋自己上《成報》fb
八方都覺得，《成報》真係無奇不有，皆因Tanya喺facebook話日日睇《成報》後，《成報》facebook專頁竟然貼咗Tanya呢個po，Tanya講起都笑唔停，自嘲「我自己推咗自己上報呀，哈哈哈！」
李八方
mailto:[email protected]