講多單可能與新世界發展（017）創辦人鄭裕彤有關嘅料。
呢排樓市活躍，連同租金跌緊嘅舖市都翻生，成日有大手舖位買賣出現。好似民生區大角嘴埃華街一個護老院舖位，啱啱以4,000萬元賣出。原本呢單刁冇乜特別，特別之處，係原業主疑似跟彤叔有啲關係。
呢個啱啱成交嘅舖位喺埃華街70至86號大成樓H座一樓K1室，大約6,000呎，由一間護老院租緊，早前一直叫價4,000萬放盤。市場消息就話，個舖日前以叫價賣出，一毫子都冇減過，呎價6,667元。
土地註冊處資料顯示，個舖原本由卡軒有限公司持有，間公司董事其中包括鄭錫強（Cheng Sek Keung Tony）。翻查資料，鄭錫強跟彤叔一名姪仔同名同姓，呢名姪仔曾經喺新世界返工。而舖位係喺2012年中以2,380萬買入，轉手賺1,620萬，升幅近七成。