國泰航空（293）行政總裁朱國樑接受《南華早報》訪問，標題為《I have the toughest job》，這個答案應該可以成為「萬能key」。
先此聲明，以下內容純屬虛構，如有雷同，純屬巧合：
大班F：I have the toughest job。你估我每年袋2億人工好容易，做我呢個位，要「先老闆之憂而憂，後老闆之樂而樂」，集團全球咁多生意，碼頭、零售乜都有，隨時周圍有火頭，生意又受經濟影響，環球經濟，我點控制？我仲要游走於大老闆與太子爺之間，生怕順得哥情失嫂意。
樓神H：I have the toughest job。我由2,000呎豪宅到200呎劏房都要賣得到，唔係點向大老闆交數？之前賣樓主要sell豪華會所，家陣要sell豪華廁所，廁所細到坐低閂唔到門，都要包裝到精心設計，以防馬桶被沖涼水濺濕，少啲腦汁都唔掂。將來分分鐘要sell富麗堂皇劏房共用公廁。
賓架G：I have the toughest job。做了5年話事人，公司不時被監管機構罰錢，股價又喜歡你讓我下沉，股東不停叫我下台，我完全無力挽，無力再挽，市場仲不時傳出公司搵人代我個位，你話我點面對江東父老。
財神T：I have the toughest job。呢個世界最難頂的工作，莫過於被逼公開認同一個你唔認同的上司。
公關X：I have the toughest job。我三番四次勸告老細答問題，要蜻蜓點水，口裏答得漂亮，實情係講咗等於冇講，點知佢每次都口若懸河，仲要講多錯多，輕易變成「關公災難」，我呢個關公認真死得冤枉！
正所謂，你有壓力，我有壓力，你份工tough，難道佢份工好輕鬆？想清楚吧。
高淑嫻
https://www.facebook.com/koc9nine