拜仁慕尼黑上周六主場俾科隆逼和1:1，唔可以喺今季德甲六戰全勝；後一日登場嘅史浩克亦同拜仁一樣「斷纜」，但唔係五連勝，而係五連敗走勢終於結束！佢哋以4:0大勝來訪嘅慕遜加柏，終於攞到今季聯賽首場勝仗。
史浩克有賀維迪斯同麥斯美亞等好手壓陣，實力其實唔錯，但開季好似撞咗邪咁，頭五場聯賽竟然輸晒。不過，幾衰嘅球隊都有反底一日，而且多數搵支實力強嘅球隊嚟反。周日佢哋迎戰今屆歐聯分子慕遜加柏，同之前判若兩隊，靠比列安保路入兩球，加埋祖普莫亭同哥列斯卡各入一球，結果大勝4:0而打開聯賽勝利之門。另外，拜仁踢完聯賽喺周日輕鬆吓，成班職球員包括曉姆斯、拿姆、教練安察洛堤同前會長漢尼斯等，帶埋另一半去啤酒節嘆番杯。
