呢排中史科又成熱話，民建聯「喊鼎鼎」周浩鼎Holden原來都係中史迷，「細細個已經對夏商周秦漢唐宋元明清背得好熟」，佢話細個讀書唔算差，有時考到頭3名，喺西灣河香港中國婦女會中學讀到中五後，到英國寄宿學校Uppingham School過咗兩年愉快時光，指學校着重全民教育多過考試求分數，對人生好大啟發。
留英受軍訓超遲鈍
37歲嘅周浩鼎話初到英國時英文麻麻，好在同學都幾照顧佢呢位「少數族裔」。除咗打籃球，佢仲學過欖球、曲棍球同木球，學咁多係咪周身刀冇張利？「哈哈，你都可以咁講，都係勇於嘗試去學吓」。寄宿初期唔習慣，皆因生活規律好嚴，10點半一定要熄燈、11點要上床瞓覺，「有次我未瞓，社監敲門後就喝住話係bedtime」。佢話嗰時逢周一都有軍訓堂，教基本軍隊步操、上彈同拆槍，「有次好辳，步操時我好遲鈍，俾教官罰，要我喺一邊練好先至入番team」。
之後周浩鼎喺英國倫敦政治經濟學院讀經濟學，佢話當時有唔少名人到學校演講，聽過陳水扁講台獨，聽到一半就走人，「因為唔啱我口味」，唔少在場中國留學生仲同陳水扁開拖。回流香港後到港大讀法律證書兼入民建聯，仕途從此一帆風順。
