呂志和獎─—世界文明獎噚晚舉行首屆頒獎禮，得獎者有雜交水稻之父袁隆平、無國界醫生同埋美國前總統卡特（Jimmy Carter），分別獲得持續發展獎、人類福祉獎同正能量獎，每位得獎者獲現金獎2,000萬、證書一張同獎座。
獎項創辦人呂志和噚日打煲呔出席，零舍醒神，佢話成立呢個獎係希望促進世界文明，建立更和諧嘅世界。
除咗獲獎者名氣有番咁上下，嘉賓都星光熠熠，包括全國政協副主席董建華、中聯辦主任張曉明、幾位特首熱門梁振英、林鄭月娥同曾俊華等，港鐵主席馬時亨入場時仲熱情捉住曾鈺成隻手，唔通想藉「馬握手」𠱁佢選特首？