路遙知馬力、日久見人心，睇人真係要睇耐啲！八方講嘅，就係梁特嘅為人。查實唔少政界老江湖一早知道689有問題，可惜普羅市民睇唔到佢嘅真偽。
今日以特首身份主持行政會議嘅梁振英，5年前嘅噚日正式離任行會，備戰特首選舉。其實CY在任行會召集人時，經常就扶貧問題等同政府唱反調，講到乜都唔關佢事咁。而當年今日接任召集人嘅夏佳理，畢竟喺政商界打滾過唔少日子，邊個係人、邊個係鬼，點會唔知？所以發言時都意有所指，話行會係集體負責，會加強同特首辦合作，唔會公開同政府唱對台，似乎暗批梁振英。
睇番呢幾年嚟，大家應該發現689嘅性格，就係人哋有錯就罪該萬死，佢錯就係人哋搞到佢錯，總之唔關佢事，夏佳理真係幾有先見之明噃！