自2004年後嘅12季西甲冠軍，巴塞隆拿同皇家馬德里夾埋拎到11次，只有馬德里體育會喺2013/14球季贏過一次咁大把。不過，以為今季又係巴塞同皇馬之爭就太老定喇，皆因佢哋周日齊齊失分，其中巴塞有門將達史特根派大膠下，作客3:4不敵切爾達，開季輸到第二場；由榜首馬體會到第五位維拉利爾只係差兩分，西甲呢個亂局夠晒刺激。
巴塞周日作客切爾達，教練安歷基之前倒親戈往績都麻麻，上季就試過作客輸1:4，今次都冇好結果。巴塞踢咗33分鐘，已經俾主隊薛斯圖同伊亞高艾斯巴斯各建一功，加上馬菲奧擺烏龍輸到0:3；下半場安歷基換入恩尼斯達救亡，呢位第600場幫巴塞披甲嘅32歲老將入到嚟，先交出助攻畀碧基破蛋，加上尼馬射入12碼，追成2:3。
巴塞門將派膠輸唔切
不過，巴塞球迷最唔期待嘅畫面喺77分鐘出現，門將達史特根或者覺得哥迪奧巴禾去咗英超扭波扭得好開心，接應隊友回傳遲遲唔大腳，左扭右扭一番，到切軍中場柏度靴南迪斯撲埋嚟先急急大腳，結果省中靴南迪斯塊面彈入網。達史特根派大膠，亦粉碎巴塞氣勢，就算尾段碧基再入一球追番3:4都係拎唔到分，俾切爾達開埋150倍「主其他」波膽。巴塞上季封王只係輸五場，今屆七戰已經輸到第二場，但安歷基賽後冇怪達史特根，話輸波係全隊責任，而且由門將發動攻勢，都係巴塞體系一部份喎。
皇馬四連和C朗死火
巴塞輸波，但死敵皇馬都唔好過，主場只能逼和伊巴1:1，基斯坦奴朗拿度（C朗）今場交白卷，狀態依然麻麻；皇馬連同歐聯已經連和四場，教練施丹咪話冇壓力。馬體會就最威，周日早場雖然有基沙文同加比射失12碼，好彩基沙文補鑊開紀錄，連同加美路埋齋贈華倫西亞兩蛋，以15分升上榜首，皇馬以較差得失球排次席，巴塞輸波之餘連西維爾都過唔到，要排到第四。不過，幾隊只差一、兩分，隨時下輪已經大執位。
神射手方面，基沙文以六球領導群雄，𠵱家仲有5.5倍都叫幾好分；刻意求冷嘅話，已入三球嘅加里夫巴利有28倍，話唔定可以趁C朗態沉入多幾粒㗎，有得爭吓！
