太陽娛樂老闆周焯華（洗米華），一直周旋喺「唯一」周太洗米嫂陳慧玲同女友Mandy Lieu之間。不過，能夠令佢動心嘅，其實唔只佢哋兩位，另外一個之唔係佢嘅「前世情人」，亦即係佢同洗米嫂所生嘅大女周梓潼（Virginia）囉！
話食包冇人理
前日讀者Karl透過本報「爆相爆片」報料，話上星期五晚10點左右，喺澳門銀河酒店見到洗米華同Virginia父女，同行仲有Virginia幾個同學，一行多人喺賭場門口經過。讀者Karl話嗰晚洗米華心情勁靚，全程專注同個女傾偈，仲主動問大家去唔去麥當勞，但係大家你眼望我眼冇乜嘢反應，之後全部人就朝foodcourt個方向行咗過去，跟住去邊就唔知道喇。
唔知係咪因為去到世界各地都會俾人偷影到，所以洗米華身邊嘅保鑣警覺性都好高，讀者Karl話佢個保鑣見到有人拎住相機或者手提電話對住洗米華，都會即刻行過去望吓，認真高度戒備，反而洗米華就好似好輕鬆咁！
