一位校友係本欄長期讀者，最近在馬場碰頭，佢捉住左丁山問幾句：「你好似幾反動噃，我個仔對你好有意見，例如你去食翅，依家好多年青人都話要環保唔食翅，我家人因仔女反對，已經幾年來冇食翅，你又唔反對開發綠化地起樓，支持發展大嶼山，同啲年青人思想脫節噃！」左丁山答：「入馬場講大道理做乜，講邊隻馬贏好過啦，你爸爸冇你個仔嘅爸爸咁有錢，你全靠自己向上爬，過往供養爸爸，現在為仔女買樓交首期，所以你年青時講經濟發展，你個仔現時年青就講環保，講綠化，講生活質素，反對一味講發展，係冇？」
校友聞言，都話講吓馬好過，其他嘢留番十月九日先至講。散咗場，在馬會食埋晚飯，又碰到一位校友談及有中大學生在凌晨於百萬大道開枱打麻雀之事，大感驚異，話學生實在離晒譜。大學生打麻雀呢回事，自古有之，餐飲M話佢在香港大學讀書年代，已經成日搵腳在薄扶林西營盤附近士多開枱，新亞學生就喺馬頭圍道附近橫街士多開枱，崇基學生就梗係在馬料水沙灘攻打四方城啦，所以大學生打麻雀，唔好提升到道德標準咁高層次，但呢幾位中大學生凌晨在百萬大道開枱，分明係過咗火位，為玩嘢而玩嘢，佢地家長若然知道，都會覺得過份、抵鬧。想證明啲乜噃？大個仔獨立自主自由呀？直情係childish。不過中大素來開放，又唔會有乜動作嘅，反正校規無明文規定在百萬大道打麻雀唔得，一切係講學生自律自重及關心自己名譽及教養嘅啫。
有啲年青人唔食翅，就唔係玩嘢，佢地嘅環保態度值得尊重，但除非世界上所有鯊魚都被列為禁捕動物，否則左丁山仍然喜歡間中食翅，目前受管制嘅鯊魚共有8種，9月24日南非召開世界大會，最新建議加入多4種鯊魚列入管制，還有好多類鯊魚可以准漁民捕捉，供應魚油、魚肉、魚皮及魚翅，故此我地點解唔食得呢？歐洲漁民捕鯊並非只為魚翅，而係為咗整條鯊魚都有賣點，有價值，只不過魚翅為華人所喜，故此賣得最貴，西方環保團體就將捕鯊行為諉過於華人食翅嘅習慣，好唔公道，不過香港及東南亞之魚翅商人絕大部份係老派商人，營運方式相當守舊，碰上21世紀嘅全球性環保組織用數碼社交網站發動宣傳攻擊，梗係捱打嘅啦。