一眾MK妹豬最愛嘅導演，有「MK活地阿倫」之稱嘅葉念琛，今年年尾又會有新作品面世，就係《失戀日》喇，一班MK妹豬係唔係好期待呢？為咗令到大家可以望梅止渴，《失戀日》嘅facebook專頁，就貼咗一條預告。
條預告真係好精采，全條片得一個人，就係麥明詩，佢一個坐喺度，不停咁喊，喊完就講咗一句：「我失戀啊。」呢啲咁有意境嘅預告，真係「MK活地阿倫」先諗到，但睇住麥明詩嘅喊戲，令人諗到另一個演員嘅喊戲，就係全個大陸冇人不知冇人不曉嘅陳偉霆喇。
記得喺上年，陳偉霆喺一套大陸劇《活色生香》入面，知大家一定係諗咗其他嘢，劇名真係叫《活色生香》啊，劇中有一場戲，就係陳偉霆知道心愛嘅女人要死，抱住佢嘅喊戲，嗰段戲真係「世界級」，完全表現出唔知笑緊定喊緊嘅功力，真係唔係人人都做得，但望住《失戀日》嘅麥明詩，唔知點解就會諗到陳偉霆，可能佢哋兩個嘅喊戲都係「世界級」!