英超今周踢到第七輪，不過已經有好多領隊勢將落台嘅消息，畢竟嚟緊係國際賽期，如果換帥就有時間畀新帥執吓個陣；史雲斯領隊古杜連上周六賽前對利物浦時，已經講過如果再輸，自己都聞到魷魚香，點知頂足成個下半場，都頂唔住紅軍攻勢，領先一球下以1:2反輸，揭幕戰贏般尼後，六場聯賽都係得一分。古杜連賽後就話：「去留嘅決定權唔喺我手上，我仲未知自己處境，我每日嘅工作係準備下一場比賽。」有傳身處威爾斯嘅史雲斯，希望搵威爾斯名宿傑斯接手，不過傑斯有望出掌英格蘭國家隊，當然hold住先。
同日好多危危乎領隊都贏唔到波，新特蘭憑雲安荷特入波，逼和西布朗1:1，開季仲未贏波，領隊莫耶斯壓力極大，不過西布朗領隊普利斯都唔係好安全，事關中資財團正洽談收購西布朗，事成後就想搵具名氣領隊，到時普利斯都要走人。而韋斯咸1:1逼和米杜士堡，開季得四分，領隊比歷都好危。不過唔好以為教英冠嘅壓力就冇咁大，阿士東維拉近九場不勝，領隊迪馬堤奧都好大機會被炒。
