莊思明同男友楊明經常高調晒愛，雖然早前傳龔嘉欣疑暗媾楊明，但男方即刻向億萬拿督千金女友派定心丸，日前去台灣玩預支蜜月，前晚兩人喺社交網貼旅行相晒愛，仲喺煙花下錫面放閃，楊明留言：「台北好玩之旅，從來沒有餓的感覺出現過。」莊思明都「夫唱婦隨」話：「呢個trip真係食到驚呀！」
不過，似乎有人唔係好妥佢哋咁癡纏，最近有網民喺莊思明嘅Instagram惡意留言：「除了悔婚男楊明出聲還要找奀星茄喱啡醒哥來幫拖。搞笑。」、「楊明，如果我進精神病院你就進醫院check性病AIDS啦。咁鍾意玩女。」不甘示弱嘅莊思明cap圖反擊：「這個人渣在我的Ig胡說八道太久了，每舉報一次就再開新賬戶來繼續搗亂，單憑你這樣說楊明我已經可以告你誹謗！」
「唔會諗係邊個」
莊思明昨喺電話話：「呢個人已經開第三個account嚟攻擊我同楊明，話我哋講大話，叫我哋快啲分手。」由於呢位網民名用「luvmatkaty」，「luv」即係love，「Mat」同「Katy」分別係楊明、龔嘉欣嘅英文名，問到莊思明有冇懷疑對方係邊個？佢話：「我唔會諗係邊個，我諗佢（龔嘉欣）亦都唔會花時間去做咁多嘢，我改咗佢（網民）個名叫葡萄乾囉！」
撰文：馮仁昭
