前星期某日，左丁山自山光道馬會坐的士返中環，適值下班時間，道路擠塞不堪，的士司機破口大罵政府無能，罵到梁振英頭上。記得上一次坐的士聽的士司機罵特首，好像已是2004年，當日的士在紅磡隧道慢如蟻行，司機又係用粗口問候董伯伯。
今次罵得較有新意，就係司機猛講：「成街都係私家車，塞死晒，點解唔抽私家車重稅呀。」左丁山回應：「大佬，私家車首次登記稅已經係好高嘅嘞，買架50萬嘅車，首次登記稅共37萬2千，係74.4%。仲唔夠重稅？」司機竟然好似愕然咁話：「乜咁高稅嘅咩？」
當然係咁高，但重稅只能降低私家車增長率，不能阻止增長，睇數據就知道香港人對私家車有鋼性需求。其實香港公共交通十分便利，搭火車地鐵去地方，容易過鬼，只係香港人口增長雖然緩慢，但絕對數值（730萬左右）並不低，所有公共交通工具在高峰繁忙時間皆用到盡，逼到爆燈，全無多餘空間，下午六點幾在電車路見到長長嘅排巴士人龍都幾得人驚，有錢買得起車用來代步嘅，邊個唔想？
正因為車可產生空氣污染，有環保團體建議中環德輔道中改為無車區變成行人專用區。左丁山日日在中環出入，覺得一啲環保人士真係過份理想主義，堅離地，完全無視中環之經濟生活。德輔道中由環球大廈至西港城一段，當然係交通災區，但呢段路若不准汽車行，沿路嘅商舖、商業大廈如何搬貨運貨？最簡單係每日工人運蒸餾水上寫字樓，每桶咁重，運水車不准駛入德輔道嘅話，叫工人用推車由畢打街行到萬宜大廈？做死人咩。中環德輔道中成為電車專綫區，並不實際，若然將皇后大道中、德輔道中、干諾道中由花園道至摩利臣街一段劃為電子道路收費區，還可以商量，即有錢人就可以每日交路費一百至二百蚊揸車出入中環，冇錢嘅唔該借歪少少，貨車的士van仔收一半，電車巴士免費，咁樣做或者可以減輕中環交通之堵塞程度。電子道路收費講咗差唔多30年，至今電子儀器硬件及軟件比30年前不知進步了多少倍，技術上完全可行，擾民程度就遠遠不如「德輔道中」成為行人專區咁大。環保團體內不乏聰明人，但似乎佢地已將環保理念轉化為環保宗教信仰，自己啱晒，其他人講吓開發綠化地／郊野公園就係腦生癌，呢啲咪叫做思想專制專橫囉！