長實地產（1113）「樓神」趙國雄出名貪靚，每次現身見記者都由頭到腳襯到絕，眼鏡都有好多副慢慢配搭。佢噚日嘅衣着亮點就係鮮黃色運動鞋，同佢件Polo襯到呢……
趙國雄好似女人晒戰利品咁話，佢對鞋係佢之前飛德國時買入嘅，呢個鞋款一共有4隻色，佢就一口氣買晒紅、綠、黃（每對約1,200元），佢冇買白色，因為佢怕易污糟所以冇買。
佢呢個濕平方式，令人諗起千禧年代港產經典喜劇《龍咁威》入邊，李燦森飾演嘅二世祖吳樹喜，一下子買入好多部同款、唔同顏色嘅車時曾經有句對白：「都係嗰句，容易襯衫吖嘛！」
代言人上身狂sell鞋
問真啲樓神，對鞋有乜咁吸引，令佢都要忍唔住手掃貨？佢即刻好似代言人上身咁，盡情發揮佢sales本色，話呢對鞋係德國牌子，舒服到着咗好似有着之餘，由於底部係膠粒，所以行山過石澗時就唔會跣腳，仲可以就咁拋入洗衣機洗，着好耐都可以好似新嘅一樣云云。聽佢一輪嘴咁講，唔知以為佢攞咗香港代理權㖭呀。
除咗衫，樓神都好注意眼鏡配搭，佢屋企收藏超過50副Ray Ban太陽眼鏡之外，佢又周不時換形象，戴過貓嘜手工框、紅色木手工框之類見傳媒。佢近年戴太陽眼鏡嘅次數都越來越密，唔通因為要度計幫長實賣樓，搞到成日熊貓眼，要遮一遮個倦容？
李華華
mailto:[email protected]